Türkmenistanda «Türkmentelekom» döwlet elektroaragatnaşyk kompaniýasynyň binýadynda emeli aň ulgamynda Başarnyklar merkezini döretmek meýilleşdirilýär. Bu barada Türkmenistanyň Aragatnaşyk ministri Hajymyrat Hudaýgulyýew Sankt-Peterburg halkara ykdysady forumynyň (PMÝF-2026) «Sanly geljek: ösüşiň umumy ugurlary, wehimler we çözgütler» atly mejlisinde çykyş edende mälim etdi.

Ministriň sözlerine görä, täze merkez milli sanly ileri tutulýan ugurlary goldamak, ylmy-barlag işlerini geçirmek hem-de ýokary hünärli işgärleri taýýarlamak bilen meşgullanar. Şol bir wagtyň özünde ministrlik halkara hyzmatdaşlar bilen bilelikde ulag-logistika geçelgelerini dolandyrmakda, nebitgaz pudagynda çaklamalary amala aşyrmakda we oba hojalygynda suw serişdelerini netijeli dolandyrmakda emeli aňy ulanmak boýunça synag taslamalaryny durmuşa geçirmegi meýilleşdirýär.

Hudaýgulyýew soňky üç ýylyň dowamynda ýurtda halkara internet kanallarynyň geçirijilik ukybynyň on esse artandygyny belledi. Onuň sözlerine görä, bu ýagdaý sanly hyzmatlaryň, elektron söwdanyň we serhetüsti maglumat alyş-çalşygynyň ösdürilmegi üçin berk binýat döredýär. Ministr Türkmenistanda emeli aňyň, uly maglumatlaryň (Big Data), blokçeýn tehnologiýalarynyň we kiberhowpsuzlygyň ykdysady ösüşiň esasy hereketlendiriji güýçleri hökmünde görülýändigini aýtdy. Şeýle hem emeli aň çözgütleriniň bilim, saglygy goraýyş, oba hojalygy we ulag pudaklarynda eýýäm ornaşdyrylýandygyny nygtady.

Ministr strategik ähmiýetli infrastruktura taslamalarynyň durmuşa geçirilýändigi barada hem maglumat berdi. Olaryň hatarynda Serhetabat – Hyrat ugry boýunça Günorta Aziýanyň bazarlaryna çykýan optiki-süýümli aragatnaşyk ulgamynyň gurluşygy hem-de Hazar deňziniň düýbi boýunça suwasty kabeliň çekilmegi bar. Hudaýgulyýewiň bellemegine görä, bu taslamalar Ýewropa bilen Aziýanyň arasynda täze ýokary tizlikli sanly ugurlary döreder we halkara aragatnaşyk kanallarynyň ygtybarlylygyny ýokarlandyrar.