Gazagystan bilen Türkmenistan Temirbaba (Gazagystan) – Bekdaş (Türkmenistan) aralygynda ýerasty optiki-süýümli aragatnaşyk liniýasyny bilelikde çekmegi ylalaşdylar. Bu mesele Türkmenistanyň aragatnaşyk ministri Hajymyrat Hudaýgulyýew bilen Gazagystanyň Premýer-ministriniň orunbasary – emeli aň we sanly ösüş boýunça ministri Žaslan Madiniň hem-de wise-ministri Dosžan Musaliýewiň gatnaşmagynda geçirilen duşuşykda ara alnyp maslahatlaşyldy.

Gazagystan Respublikasynyň emeli aň we sanly ösüş ministrliginiň sişenbe güni habar bermegine görä, täze optiki-süýümli aragatnaşyk liniýasy sebitiň üstaşyr mümkinçiliklerini ýokarlandyrmaga, halkara aragatnaşyk ulgamynyň geçirijilik ukybyny artdyrmaga hem-de Merkezi Aziýada goşmaça telekommunikasiýa ugurlaryny döretmäge giň mümkinçilik berer.

Türkmenistanyň Prezidenti Serdar Berdimuhamedowyň Gazagystana resmi döwlet saparynyň çäklerinde TNS-Plus (Gazagystan) we Türkmenaragatnaşyk (Türkmenistan) edaralarynyň arasynda serhetüsti kabel geçelgesini gurmak we magistral aragatnaşyk ulgamlaryny birleşdirmek hakynda Ähtnama gol çekildi.

Taslamany durmuşa geçirmek boýunça tehniki talaplaryny kesgitleýän we resminamalaryny düzýän bilelikdäki iş topary dörediler. Onuň esasy bölegini bir ýylyň dowamynda tamamlamak göz öňünde tutulýar.

Optiki süýümli aragatnaşyk tehnologiýasy ýagtylyk tizligini ulanmak bilen, inçejik aýna ýa-da plastik süýüm arkaly maglumatlary iberýär. Doly içki şöhlelenme ýörelgesi esasynda signal iň az ýitgi bilen geçirilip, aragatnaşyk ulgamynyň ýokary tizlik we geçirijilik ukyby üpjün edilýär.