Gazagystan Türkmenistanda öz ýokary okuw mekdepleriniň biriniň şahamçasyny açmak mümkinçiligini ara alyp maslahatlaşmagy teklip etdi.

Bu barada Türkmenistanyň we Gazagystanyň Prezidentleri Serdar Berdimuhamedowyň we Kasym-Žomart Tokaýewiň arasynda geçirilen gepleşikleriň netijeleri boýunça TDH habar berýär.

Türkmenistanyň Prezidenti 24-25-nji noýabrda Gazagystanda döwlet saparynda boldy. Gepleşikleriň dowamynda taraplar medeni hyzmatdaşlygy ösdürmegiň ähmiýetini nygtadylar, şeýle hem ylym-bilim we ýaşlar gatnaşyklaryny ösdürmegiň geljegi boýunça pikir alyşdylar.

Ikiçäk gatnaşyklaryň medeni-ynsanperwerlik ugruna aýratyn üns berildi. Kasym-Žomart Tokaýew Astanada Türkmenistanyň Medeniýet günleriniň geçirilendigini we beýik türkmen akyldary Magtymguly Pyragynyň 300 ýyllygyna bagyşlanyp onuň ýadygärliginiň açylyş dabarasynyň bolandygyny belledi. Öz gezeginde, Aşgabatda gazak şahyry Abaýyň heýkeli açyldy.

Taraplar sebitleýin we halkara gün tertibindäki meseleler boýunça garaýyşlarynyň ýakyndygyny tassykladylar. Gazagystanyň Prezidenti sebitde durnuklylygy we howpsuzlygy üpjün etmek üçin Türkmenistan bilen ýakyndan hyzmatdaşlyga taýýardygyny aýdyp, Merkezi Aziýanyň döwlet Baştutanlarynyň Konsultatiw duşuşyklarynyň we Hazar meseleleri boýunça hyzmatdaşlygyň ähmiýetini nygtady. Gazagystan Türkmenistanyň Halkara parahatçylyk we ynanyşmak ýylynyň çäklerinde geçiren çärelerine ýokary baha berdi.