Türkmenistanyň Daşary işler ministri Raşid Meredow 2026-njy ýylyň 25-nji fewralynda Ýewropanyň täzeleniş we ösüş bankynyň prezidenti Odil Reno-Basso bilen duşuşyk geçirdi. Duşuşygyň dowamynda taraplar maliýe-maýa goýum hyzmatdaşlygyny giňeltmek hem-de bilelikdäki taslamalary durmuşa geçirmek meselelerini ara alyp maslahatlaşdylar.

Söhbetdeşligiň barşynda Türkmenistanyň halkara hyzmatdaşlygyny berkitmäge, şol sanda abraýly maliýe institutlary we karz-bank düzümleri bilen hyzmatdaşlygy işjeňleşdirmäge aýratyn ähmiýet berýändigi bellenildi. Şunuň bilen baglylykda ýurduň Ýewropanyň täzeleniş we ösüş banky bilen köpýyllyk netijeli hyzmatdaşlygynyň ähmiýeti nygtaldy.

Bankyň ýolbaşçysy ÝTÖB-iň Türkmenistan bilen özara bähbitli gatnaşyklary mundan beýläk hem giňeltmäge, şeýle hem hyzmatdaşlygyň ileri tutulýan ugurlary boýunça taslamalara gatnaşmaga gyzyklanma bildirýändigini tassyklady.

Halkara Gündogar–Günbatar ulag geçelgesini döretmek boýunça taslamalary durmuşa geçirmek meselesine aýratyn üns berildi. Türkmen tarapy bu ugurda başlangyçlara gatnaşmak boýunça Ýewropanyň täzeleniş we ösüş bankynyň anyk tekliplerine garamaga taýýardygyny tassyklady.

Şeýle hem ileri tutulýan ugurlaryň hatarynda energetika pudagynda hyzmatdaşlygy giňeltmek bellenildi. Bu babatda durnukly energetika ulgamynda durmuşa geçirilýän taslamalara Ýewropanyň täzeleniş we ösüş bankynyň gatnaşmagy üçin giň mümkinçilikleriň bardygy bellenildi.

Duşuşygyň ahyrynda taraplar ikitaraplaýyn hyzmatdaşlygyň mundan beýläk-de yzygiderli ösdüriljekdigine ynam bildirdiler hem-de birek-birege iň gowy arzuwlaryny beýan etdiler.

ÝTÖB Türkmenistan bilen 1992-nji ýylda hyzmatdaşlyga başlady. Ýewropanyň Täzeleniş we ösüş banky Türkmenistanda 80-den gowrak taslama durmuşa geçirilip, olaryň aglabasy eksport edijileri goldamaga gönükdirilendir.