Türkmenistanyň Aragatnaşyk ministrligi ykdysadyýetiň sanly özgertmelerine gönükdirilen giň möçberli maksatnamany durmuşa geçirýär. 2028-nji ýyla çenli halkara optiki-süýümli aragatnaşyk ugurlarynyň sany 11-e ýetiriler. Ministrligiň resmi saýtynda berilýän habara görä, täze serhetüsti optiki-süýümli magistrallaryň gurluşygy meýilleşdirilýär.

Habarda bellenilişi ýaly, Türkmenistan Merkezi Aziýa sebitinde Gündogar bilen Günbataryň, Demirgazyk bilen Günortanyň arasynda möhüm maglumat-aragatnaşyk köprüsi hökmünde ornuny berkidýär.

Aragatnaşyk ministrligi halkara aragatnaşygy ösdürmegiň iki esasy ugrunda işleri alyp barýar. Birinji ugur «Arkadagyň Ak ýoly bilen Serhetabat — Hyrat» optiki-süýümli aragatnaşyk ugrunyň gurluşygyny göz öňünde tutýar. Bu taslama üstaşyr şol bir wagtda Hindistanyň telekommunikasiýa hyzmatlary bazaryna çykmaga hem mümkinçilik döreder.

Ikinji strategik taslama Azerbaýjan bilen hyzmatdaşlykda amala aşyrylýar: «Türkmentelekom» we «Azertelekom» kompaniýalary Hazar deňziniň düýbi bilen suwasty optiki-süýümli aragatnaşyk ugruny çekýärler. Şol bir wagtyň özünde Etrek — Inçeburun hem-de Bekdaş — Temirbaba ugurlary boýunça ýerüsti magistrallaryň gurluşygy alnyp barylýar.

Bu taslamalaryň durmuşa geçirilmegi halkara optiki-süýümli birikmeleriň sanyny sekizden on bire çenli artdyrmaga we milli maglumat geçiriş ulgamynyň geçirijilik ukybyny birnäçe esse ýokarlandyrmaga mümkinçilik berer.